考驗

星期三想俾婆婆公公休息多一日.
但公司又有野做, 所以呢日搵左個住附近既朋友幫手湊田鼠b.
不過要擺低田鼠b俾人地, 個心有啲唔係好安樂.
惟有事前不停向佢解釋件事, 希望佢會明啲...
果朝早我拖住佢慢慢行去朋友屋企既路上, 心情有啲沉重...
(我終於明白點解有啲家長送小朋友番幼稚園會喊喇!)
但出乎意料, 佢反而無乜野, 仲同我錫錫兼拜拜添.
絕對無我想像中既痴纏同不捨.

不過好景不常...
搭緊車途中, 朋友已經whatsapp話田鼠b狂喊, 係咁叫mama, baba, 要出去.
佢地要出動絕招安撫: 餅餅! 電視!

一聽到真係好心痛...
田鼠b, 唔洗驚呀, 我地唔係唔要你呀, 你唔好喊啦!

番到公司, 我同事話我個樣好worried.
部腦竟然搞左大半個鐘都boot唔起!
心諗有無咁邪呀?! 果下簡直頭頂出煙!
由於心繫田鼠b, 成朝喺office個人lor lor 攣, 心神恍惚, 都唔知做左啲乜...

好彩朋友好好人咁不斷send 相update我, 睇到啲相安樂好多...

佢個樣好明顯啱啱喊完
食左餅叫做冷靜啲啲

玩波, 畫畫, 食mum mum

不過無幾耐, 田鼠b又喊過.
朋友搞唔掂喇, 所以晏晝搵左另一個住附近既朋友接力.
佢黎接力時, 田鼠b已經瞓著左 (俾左個好好既機會佢做健身).

呢位朋友屋企有對9個月大既孖仔
尚未識行, 仲係容易控制既階段

朋友話田鼠b瞓醒之後, 周圍望, 無喊.
我諗佢當時個小腦袋可能諗緊呢日究竟發生咩事呢.
咁多奇遇, baba mama唔見晒, 瞓醒又去左個陌生地方.

有賴whatsapp既發明同朋友相助, 我又可以繼續睇到田鼠b既動靜喇!

食梨

玩波

朋友果然有氣有力
晏啲仲帶左田鼠b落樓下玩

漸漸地朝早果種煩燥不安既感覺無晒咁滯, 我個心開始平靜落黎...

5點開始, 田鼠b又開始嗌mama, 瀑布, baba
結果又要出動安撫餅餅

放工上到朋友屋企, 田鼠b食緊餅 (有理由相信佢係由朝食到晚既).
佢一見到我, 馬上嘴角向下一彎, 一副委屈樣, 不過就成功忍住無流淚.

都算係個勇敢既小朋友!

phew! 呢日總算有驚無險, 順利過渡.
對田鼠b黎講, 都係一個好大既考驗 (掌聲鼓勵!).
而對我黎講, 最最難捱都係朝早果段時間.
另一方面又覺得煩到啲朋友仔, 好唔好意思.
希望無下次啦!