學生相

星期六朝早去左買校服同書包.
我地每set (運動服/校服)都買左兩套, 方便替換.
跟住帶田鼠b去葵芳影學生相 (學校要求交6張).
快圖美$65/8張 (會員8折).
隔離商場果間$30/6張.
價錢差咁遠, 梗係揀隔離商場果間啦.


果個人一黎就問田鼠b幾多歲, 原來2歲以下要收$80 (但又任我嗡幾多歲都得架喎).
去到影相個位, 都小小迫狹, 影相佬後面無位俾我地企.
但想企埋啲又唔得, 話會遮到個閃光燈.
咁惟有嘗試喺側邊引導佢啦.
點知個影相佬話唔好, 佢話我地講野會令田鼠b分神, 唔聽佢既指令.
下, 佢其實有無幫過呢個年紀既小朋友影相架, 我地講唔講野都唔見得佢會聽你講囉.
不過即管睇下你有咩殺手鐧.
"小朋友, 你唔坐直啲, 跌跌架喇" <-- 唔洗問, 田鼠b聽完呢句更緊張
跟住佢拎左個有啲歷史既沙槌出黎搖, 但田鼠b一啲反應都無 (i wonder 有無人曾經有過反應).
影左幾張, 就指住張田鼠b皺晒眉既話, "呢張ok呀".
唔係呀嘛, 如果我咁都收貨就真係對唔住自己咯.

最後我地都係過番隔離快圖美 (想慳番啲食兩串魚蛋都唔得).
果度環境靜啲同闊落啲, 起碼我地可以企後面引到佢笑先啦.
雖然佢唔係望住鏡頭, 件衫又歪.
但有之前果間野墊一墊底, 我地都照收貨.
果下連店員姐姐都暗示 are you sure?
證明佢原本仲有耐性影落去架...

影埋相, 開學事宜都已經準備得七七八八.
姓名label唔諗住整喇. 同事教落, 直接用原子筆寫落件衫既label就得.
今晚拎埋個印仔, 星期六去醫生度填埋張健康申報表就等開學喇!