Oh dear, 個blog發晒霉仲生埋青苔, 過黎抹下掃下塵先, 順便寫寫幫阿仔搵小一有血有淚既故事...
話說, 佛系既我哋由頭到尾乜直資私立都無報過, 好老定咁一心諗住自行已經攪得掂.
所以11月尾既自行失敗, 殺我哋一個措手不及, 果下有啲慌有啲亂.
周圍咁搵人傾搵人問…果日先至攪得清咩叫111呀陰公(唔好鬧我!)
好喇, 集眾人意見, 兩公婆自己衡量過後, 就的起心肝搵屋搬喇.
無錯, 咁大個人做埋啲咁任性既野, 真係好癲 (可憐天下父母心).
搬屋其中一個原因, 當然係希望可以增加抽到既機會. 因為阿仔間幼稚園無名氣, 又係happy school, 佢又完全無上任何補習班, 真係要叩門的話估計無乜著數.
其二, 就係本身住果區既小學質數比較差齊, 分佈範圍亦頗廣泛, 遠起上黎搭車都幾金.
就係咁, 諗過度過, 我哋果斷搬咗屋.
終於真正明白孟母既感受.
好喇, 到統一派位結果出左喇喎.
唉, 無語問蒼天! 時不予我! why me!
始終都係要行叩門路線!
好彩, 緊張大師, 即係我, 一早已經填定晒啲form, 印定portfolio, 第一時間去交表.
Anyway, 抽到果間鍾唔鍾意都好, 都要去左註冊罷左個位先, 話唔埋, 去完會鍾意間學校呢.
但偏偏, 去完交表後個感覺麻麻哋…雖然校舍好大, 老師亦有禮貌, 但個校車同書商感覺都…最重要係, 交通唔方便, 校巴又唔到樓下. 不過心知如果最後真係一間都叩唔到, 只有接受現實...
成件事我最關心既係阿仔既感受…
人仔細細, 點解要佢受埋啲咁既壓力呢, 我有啲唔忍心.
所以我淨係同佢講, “我哋黎緊會去揀學校, 睇下啲學校好唔好, 你睇下鍾意邊間同我講呀. 啲老師到時都會問你問題, 因為佢哋都想了解下你. 你好似平時咁講野就得架喇.”
除左最想入果間, 2nd in 前我有同阿仔練過幾條問題之外, 其他5間我都係同佢講以上呢番說話. 而佢亦信到十足, 每次in完出黎都第一時間報告俾我聽鍾唔鍾意間學校.
最後in左6間, 3間收左佢.
我想話, “阿仔你好叻呀”. 雖然最想入果間入唔到, 但我成日覺得緣份既嘢, 無得勉強.
好似溝仔溝女咁, 唔係靠努力人哋就會鍾意你架嘛.
呢幾個禮拜, 我由當初知道結果既灰爆心情到而家既坦然接受.
件事令我都成長咗呀. 哈…
***報告完畢***
我而家既願望就係, 升小後, 放學就係放學. 做完功課就係玩既時候. 唔補習. 興趣班都係佢自己真正既興趣.
