星星粉

禽日買左呢包星星粉, 今個weekend會整俾田鼠b試下.
本來貪佢方便啲, 唔洗好似煲粥咁煩.
但聽講要煮得淋, 最好事先浸番一個鐘先.
原來都唔係想像中咁簡單... 

另外, 近期發現超市賣既台灣入口農產品有幾樣都唔錯.
加落粥仔, 會當堂令成件事生色不少.

其中呢款冠軍牌黃心番薯, 又香又甜.
除左加落田鼠b既粥仔外, 可以當佢既茶餐, 又或者烚黎自己食! 
我會揀啲細細條既, 食幾多煮幾多.


另外試過台灣既粟米同白蘿蔔, 都好回味.
白蘿蔔除左香甜之外, 仲要無渣. 而家諗起都流口水!
不過要見到一個完整既先好買, 因為驚有時超市會將啲過期既切左壞果part, 包番保鮮紙黎賣...


weekend整粥仔俾田鼠b要買材料, 以前我會逢禮拜五放工後自己食完飯就去屋企附近既超市買餸.
另一邊田鼠爸就自己食完野去田鼠婆婆屋企接田鼠b, 再黎join埋我一齊番屋企.
但通常我去到超市時已經無乜選擇 (尤其係肉類).
再加上有時田鼠爸夜左放工 (我自己就99%準時收工既), 我就會好頭痕.
要走來走去, 再揹住舊10kg+既野去買餸, 可以想像到個情況係點...
個人攰, 心情自然不爽, 有人會被鬧(得多啲).

近呢兩個禮拜五, 轉左叫亞媽幫手買定餸 (世上只有媽媽好 ), 我地去接田鼠b時拎埋.
呢個新安排既好處多多, 應該都會繼續.
一黎亞媽自己買餸時順便買埋.
二黎佢唔一定要去超市, 可以去街市, 又多選擇又新鮮啲.
三黎我地淨係拎weekend既份量, 唔洗驚嘥野.
再黎我又唔洗咁辛苦.

不過我有時間的話, 都會繼續去超市發掘下有咩特別材料.
 例如呢包台灣番薯, 都係自己買既.