博物館

話咁快, 我地喺今年4月買既半年博物館pass就黎到期.
數一數手指, 原來我地只係去左兩間博物館咁大把 (科學館同沙田文化博物館)!

既然係咁, 就再戰科學館啦.
入館前, 坐低食個靚飯先.
點知有人唔乖, 花左好多功夫先tum到佢食晒碗粥.
食完餐飯, 我已經身心疲憊.

額頭鑿左個"曳"字既小朋友

唔知係咪因為出緊大牙, 所以佢又有番小小啜手跡象

不過今次覺得科學館唔係幾好玩, 入左去唔夠15分鐘已經好想走.
連上次覺得最好玩既鏡子世界, 都今非昔比.
成陣裝修味 (隔離裝修緊), 又無左果塊萬花筒鏡.

兒童遊戲室入面, 除左呢個波, 都無咩吸引到佢

一場黎到呢度, 又無理由就咁走左去既.
所以連對面既香港歷史博物館我地都唔放過!
結果反而喜出望外, 入面既展覽都幾得意, 好多野都吸引到田鼠b既注意力.

曾幾何時, 代表香港既帆船...

手指指

張博物館pass我地應該唔會再續喇.
一黎香港仲有好多地方去, 二黎好多展覽其實都未啱田鼠b睇住.
可能過多幾年再諗啦.

鏡頭一轉, 黎到田鼠爸既母校.
原來佢下晝有場old boys足球比賽.
最開心係一去到, 就有人話田鼠b同我愈黎愈似, 簡直一模一樣. WAHAHAHAHAHA!
對上一次田鼠b黎捧場, 田鼠爸好難得地入左一球添.
今次都有入波呀! 不過係對手入既.

爸爸踢緊波, 田鼠b都想玩波

唔夠高攞唔到波, 無晒心機

咩事睇到入晒神?

原來有個手球比賽頒獎禮 
(田鼠媽: 仲有涼浸浸既冷氣吹出黎添)

伸個懶腰先....咦...果邊有個靚女姐姐呀!

兩小無猜
(呢幾張相有啲陽光檸檬茶廣告feel...嘻嘻...)

次次黎捧田鼠爸場, 喺後場都會遇到其他小朋友.
好多時田鼠b都會同佢地一齊玩.
而佢地亦絕大多數都好friendly.
今次呢個靚女姐姐就陪田鼠b玩左好耐, 又成日幫佢執波, 反而田鼠b成日遊魂咁走左去...(唔通佢覺得咁樣會man啲?)

喺屋企樓下既會所, 田鼠b曾經俾人推跌, 從後大力箍頸. 每次我都要睇實啲.
反而喺呢度, 我可以放心咁由得佢去同其他人玩.
我都好慶幸田鼠b唔係惡霸形既小朋友, 佢從來唔會去搶人玩具, 更加唔會打人或者推人.