海洋公園2014

又係一年一度享受公司福利時間, 今年去我至like既海洋公園. yeah!

星期日朝早10點鐘黎到公園門口, 溫暖既陽光, 加唔算太多既人流, 感覺良好.

對噴泉瀑布類情有獨鍾既田鼠b
喺門口已經好開心

識得玩, 一定第一時間去搭吊車.
不過入到去見到鯊魚哥哥, 又無人排隊, 無理由唔同佢影張相先.

鯊魚哥哥一見面作狀咬田鼠b個頭, 嚇到佢呆呆地
哈...

跟住順便探埋我至愛既盈盈樂樂先.
(仲記得舊年帶田鼠b weekday黎, 竟然無開...)

瞓緊覺既小熊貓好鬼cute

田鼠b開始有返啲表情
後面食緊竹葉果隻係樂樂

佢呢個手勢係扮緊柯柏文

所以睇完熊貓我地就去搭吊車喇.

排左隊10分鐘都唔洗.

田鼠b: 巧驚驚呀...會唔會跌跌架? 點解...架車無轆既?

過到去, 我地分批玩左幾個新既機動遊戲.
熱帶激流, 都幾濕身下, 唔怪之得門口有人買雨褸...好彩有太陽啲衫好快乾咋!
瘋狂過山車, 我就唔夠膽玩喇...
極地時速, 刺激度對細膽既我黎講啱啱好!
至於田鼠b, 佢唔夠高, 得個睇字...

唔知係咪悶親, 嬲左我地呢...

唔怕, tum(揤)返佢咪得囉!

本來身為鞦韆控既我好想好想玩呢個超速旋風.
但見到田鼠b悶親既樣, 唉, 算啦...
同佢一齊睇下乜館物館好過.  <-- 慈母

肥嘟嘟既海獅, 係咁易用雙手撥一撥, 已經可以遊得好遠
(點解我唔得既?)

好靚既雪狐
有啲似白色既松鼠狗

一入企鵝館見到班企鵝就咁企晒喺度唔郁, 仲以為係假既添

鯊魚館無影相添.
不過多數都係鯊魚仔.
係有一條大隻小小, 個樣好似好惡(其實係哨牙), 好似卡通片入面既奸角!

夠鐘食晏, 企鵝餐廳等左好耐都無位.
我地轉移陣地去露天terrace cafe.
其實呢啲天氣, 有小小陽光坐室外啱啱好.

有無留意枱面好多隻杯?
原因係我地其中一個有annual pass, 每$100就送兩杯橙汁
最終我地total飲左14杯!
WAHAHAHAHA

食完飯, 我地犯左全天下公園遊客都會犯既錯 -- 就係去睇海洋劇場.
呢個大概30分鐘既show, 其中25分鐘係講野, 真正既海豚海獅表演得果5分鐘.
真係睇一次後悔一次.
今次真係要記住, 唔可以再俾自己犯錯喇.

睇完show, 發覺呢邊既遊客明顯多左.
於是我地又坐吊車返返另一邊.

經過舊墟時忍唔住影相

呢個低b版摩天輪, 好似悶親田鼠b

坐火車

最後我地玩左幾個攤位遊戲, 睇埋雀鳥劇場就走人.
平時要瞓晏覺既田鼠b可以捱到離開果刻, 好犀利.
證明有得玩, 真係乜都得!

仲有就係, 呢度既豉油王雞脾好搶手.
行左好多檔都賣晒.
卒之喺兒童樂園先買到!