露營 - 西貢灣仔

秋高氣爽, 最啱戶外活動.

今次我地揀左去露營.

地點係西貢灣仔 (西貢市中心搭94號巴士到黃石碼頭, 再轉船), 兩日一夜.

出發前喺西貢食左個all day breakfast
雖然餐廳環境好似唔錯, 但味道就...

食完早餐, 等齊人就行去搭巴士.
架巴士好迫好迫, 原因係9成人 (包括我地) 都揹住大大個既背囊.
都係既, 咁好天唔好嘥.
跟住幾個字車程就黎到黃石碼頭.

一落車有個阿姐行埋黎問我地幾多人, 去邊.
我地架巴士遲左所以miss左班船兼且有排等, 於是決定跟阿姐架大飛.
廿蚊位, 大小同價.
阿姐係生意人, 細路雖然要計錢, 但原來唔計位喎.
最終架船total坐左三批人 (19個大人 + 4個細路).
仲有10幾個大背囊.
我絕對有理由相信佢係嚴重超載.
但我地坐中間, 洗濕左個頭, 後悔已經太遲.

呢程船安唔安全, 就見人見智.
但呢10分鐘既刺激就一定係真既.
臨走阿姐仲俾左張咭片我地其中一位男仕 (請留意, 另外兩班人無架).
話回程仲可以搵佢, 有"幽會" (結果呢個"幽會"就係free左一個俾我地, 好過無啦!).

上岸果度係"南營", 地方細啲, 不過近廁所方便啲, 同少啲人.
我地就揀左再行上小小既"西營".

"西營"呢度好大好闊落

不過其實我地黎到已經下晝兩點幾, 算幾遲下.
靚位無晒, 枱又無, 唯有罷番兩個燒烤爐啦.
幸好周圍既人仕都好friendly.
好幾次主動埋黎提醒我地呢樣果樣.
人間有情!

擺低野之後田鼠b開始視察環境

然後幫手set up 帳幕

dun dun dun dun

再加個外幕, 就可以隔開露水同有返啲privacy

裝備

特登買俾田鼠b既睡袋

settle down左就同田鼠b出去踢波
好快有個姐姐出黎接力

同朋友仔一齊

去廁所有shortcut
雖然崎嶇左小小, 但真係近好多

煮食時間

呢日好好天, 夜晚可以睇到好多星星, 大大粒, 好靚呀!
田鼠b就成日要戴住頭燈去睇牛牛, 同埋去v v.

夜晚好應聲, 無可避免會聽到附近啲人講野.
第二朝一早7點幾啲人陸續開始起身同pack野, 啲聲令我地想瞓晏啲都唔得.
不過清潔工人亦都已經黎到同好勤力咁清緊垃圾筒同地下既牛屎.
所以呢個營地都算打理得幾好.

田鼠b食完個早餐又開始踢波

仲有個好好人既叔叔借紙鳶俾佢玩

望住滿天既bubble, 佢好happy

臨別秋波同牛牛合照
最後我仲請左隻牛食椰菜 (用唔晒)

總結今次兩日一夜既露營經驗,

洗費:

• 帳幕: HK$1400 (成個活動靈魂所在, 最緊要既一環, 貴啲都要)
• 登山背囊 x 2 + 地墊 x 3: RMB5XX
• 雜項 (交通+食物+cookset+頭燈+電筒+衫褲鞋襪): HK$1500

結論係:

• 一定要早啲去到罷枱罷地. 罷到個靚位好緊要, 同埋無枱食飯係好攰既一件事
• 燈唔怕多. 夜晚真係好黑...
• 煮食要簡單方便. 唔係就煮既又辛苦, 等既仲辛苦.
• 盡量lunch前走. 除左唔洗咁曬之外, 仲可以早啲返屋企休息.
• 小朋友戒晒片或者未戒片先好去. 戒左一半就有啲辛苦, 一係揀近廁所位
• 牛出沒注意. 除左昆蟲外, 仲有啲牛鍾意就走埋黎, 聽講會走黎舐啲帳幕! 
• 最後, 露營係體力勞動 (尤其係帶住小朋友), 出發前要好好補充體力. 臨走都記得保留小小體力去收返個營.