人算不如天算

上星期一(8月4日)本來係田鼠b開學日.
點知人算不如天算, 開學日變入院日.


話說, 之前果晚食緊晚飯都仲好地地.

外表毫無異樣

但食食下情況急轉直下.
佢開始扭計, 好似好攰咁, 又唔太肯食野.
返屋企途中瞓著左.
成個人熱熱地, 但無汗流, 探左幾次熱都係37.X度.
有啲氣促, 個肚腩仔起伏得好勁.
我地一路都以為佢係中暑, 有幫佢抹身.
呢晚佢每隔15-30分鐘就喊醒扭抱, 第二朝真係得返半條人命...

朝早佢終於識得流汗, 依然氣促.
帶佢睇醫生, 聽完個肺就話要照X光 (果下先識驚).
Confirm有初期肺炎.
醫生俾我地揀喺屋企食藥同觀察, 或者入院.
肺炎可大可少, 我地都覺得入院穩陣啲.

不過間私家都幾煩, 原來有轉介信又有房都唔係話入就入.
一黎要睇多次佢既醫生 (即係要等...).
二黎要驗有無流感 (又係一輪等待...), 無先俾入, 因為佢地無隔離病房云云.
但我其實唔係好明, 肺炎本身都會傳染架啦.
隔離病床高燒左幾日添, 咪一樣入到黎?

總之喺等待入院期間既心理係最辛苦既...
問左另外兩間話兒童床位已full.
諗住worst case入政府 (兒童病房都可以24小時陪, 但就得張櫈仔, 無床).

等到晏晝一點幾, 醫院終於打黎話confirm無流感可以入院喇!

day 1: 啱啱入院吊緊鹽水既樣, 睇見都心痛

day 1: 夜晚已經唔同晒

day 2: 龍精虎猛

day 3: 醫生話個肺聽落清晒, 觀察多一晚應該可以出院
唔洗吊鹽水既田鼠b爽晒
可以出走廊活動下

day 4: 朝早出院.

R到隻機械人