喊完未

田鼠b上個禮拜入左院, 錯過左開學.
亦錯過左頭三日可以家長陪上堂既日子.

day 1
今個星期一(Aug11)先係佢第一個返學日.

一三五著運動服

果日我負責送佢返.
黎到課室, 聽老師既口吻, 我其實可以留低陪佢 (可能因為之前我地錯過左).
但我覺得遲早都係要佢一個去面對, 所以都無留低 (係果斷定狠心?).
同佢byebye既時候, 佢都無乜野, 可能未識驚.
到放學婆婆去接佢, 話全班大合唱緊, 無喊既得幾個.
好彩田鼠b一抱上手就無事.
果晚, 我問佢返學好唔好玩, 佢竟然答"好玩"....
究竟佢知唔知自己講緊乜?

day 2
星期二, 朝早喺屋企換校服時出現小小阻力.
不過平時換衫不嬲都有阻力, 呢個問題應付開無難度.

逢二四著校服

呢日去到學校門口佢已經開始喊.
不過婆婆放學接既時候佢又無喊喇喎.

day 3
星期三, 黃雨休息一天.

day 4
到左今日星期四, 朝早換校服又出現阻力.
堅持要帶埋呢隻野先肯出去, 兼指明要擺落我個袋 (好彩個tote袋夠大).

價值不菲既柯柏文
前面睇都幾型仔既

後面就...
好似揹住個龜殼咁seven

今日婆婆負責送.
送時喊, 接時都喊.

-------------------
阿仔, 你估你會喊到幾時呢?
(上網睇見有啲人話喊足一年, 我好驚.)

不過其實呢, 諗深一層, 喊都係正常既表現.
話晒佢出世咁耐, 未試過同屋企人分開, 一下子好難接受.
仲要啱啱病完, 佢已經比平時黐身左.
需要時間慢慢去適應, 都好正常.
加上又未太識用言語表達自己, 所以咪喊囉.

反而婆婆成日話心痛, 搞到我個心有啲亂....

"強烈不滿我人仔細細就要返學"